– నల్గొండలో మానవత్వంపై మృగాడి దాడి
నల్గొండ క్రైమ్, తొలివెలుగు : సహాయం కోరిన వాడికి ఆశ్రయమిస్తే.. ఆ ఆశ్రయమిచ్చిన చేతినే నరికేందుకు ప్రయత్నించాడో కిరాతకుడు. నల్గొండ జిల్లాలో మానవత్వాన్ని మంటగలిపే దారుణ ఘటన చోటుచేసుకుంది. లిఫ్ట్ అడిగి కారు ఎక్కిన ఓ గుర్తు తెలియని వ్యక్తి, కారు యజమానిపైనే కత్తితో ప్రాణాంతక దాడికి పాల్పడిన ఘటన స్థానికంగా కలకలం రేపింది.
అసలేం జరిగిందంటే?
నల్గొండ జిల్లా కేంద్రానికి చెందిన ఇమ్రాన్ అనే వ్యక్తి తన వ్యక్తిగత పనుల నిమిత్తం కారులో హైదరాబాద్కు బయలుదేరారు. మార్గమధ్యలో నార్కెట్పల్లి వద్ద ఓ వ్యక్తి లిఫ్ట్ అడగడంతో, ఇమ్రాన్ మానవతా దృక్పథంతో అతడిని కారులోకి ఎక్కించుకున్నారు. కారు చిట్యాల సమీపానికి చేరుకోగానే, వెనుక సీట్లో కూర్చున్న సదరు వ్యక్తి ఒక్కసారిగా తన వద్ద ఉన్న కత్తితో ఇమ్రాన్పై దాడికి దిగాడు.
విచక్షణారహితంగా కత్తిపోట్లు
దుండగుడు ఇమ్రాన్ మెడపై, శరీర భాగాలపై విచక్షణారహితంగా కత్తితో పొడిచాడు. తీవ్రంగా గాయపరిచి, ఇమ్రాన్ వద్ద ఉన్న నగదు, సెల్ఫోన్ లాక్కునేందుకు ప్రయత్నించాడు. అయితే, ప్రాణాపాయ స్థితిలో ఉన్నప్పటికీ ఇమ్రాన్ ధైర్యంగా దుండగుడిని ప్రతిఘటించాడు. ఇమ్రాన్ గట్టిగా కేకలు వేస్తూ ఎదురుదాడికి దిగడంతో, పట్టు దొరకక భయపడిన నిందితుడు కారు దిగి అక్కడి నుంచి పరారయ్యాడు.
ఆస్పత్రిలో చికిత్స
రక్తపు మడుగులో పడి ఉన్న ఇమ్రాన్ను గమనించిన స్థానికులు వెంటనే స్పందించి 108 అంబులెన్స్కు సమాచారం అందించారు. ప్రస్తుతం బాధితుడిని ఆస్పత్రికి తరలించి చికిత్స అందిస్తున్నారు. సమాచారం అందుకున్న పోలీసులు కేసు నమోదు చేసి, పరారీలో ఉన్న నిందితుడి కోసం గాలింపు చర్యలు చేపట్టారు.
పోలీసుల హెచ్చరిక:
గుర్తు తెలియని వ్యక్తులకు లిఫ్ట్ ఇచ్చే సమయంలో వాహనదారులు అప్రమత్తంగా ఉండాలని పోలీసులు ఈ సందర్భంగా హెచ్చరిస్తున్నారు.
